ह्या योजनेच्या संदर्भात त्या वेळचे महाराष्ट्र राज्याचे शिक्षणसंचालक श्री. वि. वि. चिपळूणकर यांनी महाराष्ट्रातील काही शिक्षकांचे एक शिबिर तळेगावच्या रामभाऊ परुळेकर विद्यानिकेतन येथे घेतले होते आणि आराखडा तयार केला होता. हे शिबिर एप्रिल-मे दरम्यान आयोजित केले होते. त्या शिबिराला दादा अर्थातच होते.

दादांच्या आत्मचरित्रासंबंधी ज्या वेळी जूनमध्ये दूरदर्शनवरून वृत्त प्रसृत झाले, त्या वेळी हे आत्मचरित्र शिक्षकवर्गाला नवी दिशा दाखवणारे असले पाहिजे असे मला वाटले. मी या बाबतीत दादांशी बोललो तेव्हा दादा म्हणाले, “बापू, तुला माहीत आहे, की १९७८च्या सुमारास मी माझ्या आयुष्यातील काही आठवणी लिहून काढल्या आहेत. मजकूर तयार आहे. मात्र तो शासनाच्या आराखड्यात बसवायचा.” मी दादांना म्हटले, “तुमच्या अमृतवर्षातला हा महत्त्वाचा योग आहे. त्या टंकलिखित आठवणी मी वाचतो आणि नंतर आपण आराखड्यासंबंधी बोलू या.” माझ्या या म्हणण्याला दादांनी कबुली दिली.

शासनाला सदर आत्मचरित्र सप्टेंबरअखेरपर्यंत निवडसमितीपुढे ठेवायचे होते. मला हे निराळ्या प्रकारचे आव्हान वाटले. त्यानंतर दादांनी आणि मी आत्मचरित्राच्या रूपरेषेचा विचार केला आणि ती रूपरेषा दादांचे स्नेही श्री. ग.रा. कामत ह्यांच्याकडे मार्गदर्शनासाठी पाठविली. शाळेचे दोन माजी विद्यार्थी श्री. सदानंद घासकडवी आणि श्री. शशिकांत बांबर्डेकर ह्यांच्या मदतीने पुस्तकाची रूपरेषा निश्चित केली. दादांच्या आठवणी वाचताना, कोणत्या आठवणी आत्मचरित्रात घ्यायच्या त्या पृष्ठांवर खुणा केल्या. त्या दादांना दाखवल्या. दादांनी त्यातील काही आठवणी निश्चित केल्या. त्यानंतर प्रकरणे कोणती असावीत यावर आमची चर्चा झाली आणि आत्मचरित्राचा मसुदा नक्की केला. दादांच्या सल्ल्याने तयार झालेल्या आत्मचरित्राच्या तीन प्रती तयार केल्या.

दादांनी आत्मचरित्राचा तो मसदा, एका दिवशी रात्री १०च्या सुमारास वाचण्यासाठी घेतला. दादा सकाळ ४ वाजेपर्यंत आपले चरित्र वाचत होते. काही खुणाही करत होते. मी पहाटे चारच्या सुमारास झोपेत होतो. दादांनी मला उठवले व आपल्या झोपण्याच्या खोलीत बोलावले. दादा म्हणाले, “सर्व आत्मचरित्र रात्रभर वाचलं. आता ते निवडसमितीकडे द्यायला हरकत नाही.’ दुसऱ्या दिवशी आत्मचरित्राच्या निवडसमितीचे सदस्य श्री. श्री. पु. भागवत आणि श्री. प्रभाकर नेरूरकर ह्यांच्याकडे आत्मचरित्राच्या दोन प्रती सायनला श्रीपुंच्या घरी मी नेऊन दिल्या. दादांच्या आत्मचरित्र लेखनासंबंधी आमच्या थोड्या गप्पा झाल्या आणि मी घरी आलो.